काठमाडौं । नेपाल प्रहरीले अवैध सुनसहित एक जनालाई पक्राउ गरेको छ । प्रहरीले त्रिभुवन अन्तराष्ट्रिय विमानस्थलबाट ७ सय ७७ ग्राम सुन सहित भारतीय नागरिकलाई पक्राउ गरेको छ। पक्राउ पर्नेमा भारतीय नागरिक पश्‍चिम विहारका ३४ वर्षीय विकास महाजन रहेका छन् ।

सारजाह एयरलाइन्सको विमानबाट दुबई हुँदै काठमाडौं आएका उनीलाई त्रिभुवन विमानस्थल विशेष सुरक्षा कार्यालयले विमानस्थलको आगमन टनेल गेटबाट मंगलबार पक्राउ गरेको हो । प्रहरीले विकासको साथबाट ७ सय ७७ ग्राम तौल बराबरको १ थान सुन र ५ सय दरका भारतीय १९ हजार ५०० रुपैंयाँ बरामद गरेको छ ।

पक्राउ परेका उनलाई बरामद सामानसहित आवश्यक अनुसन्धानको लागि त्रिभुवन अन्तर्राष्ट्रिय विमानस्थल भन्सार कार्यालय गौरचणमा बुझाइएको अन्तर्राष्ट्रिय विमानस्थल सुरक्षा कार्यालयले जनाएको छ ।