काठमाडौं । निलम्बित प्रधानन्यायाधीश चोलेन्द्रशमशेर जबराविरुद्ध दर्ता भएको महाअभियोग प्रस्ताव निष्कृय भएको छ । संघीय संसदका महासचिव डा. भारतराज गौतमले प्रधानन्यायाधीश जबरालाई महाअभियोग प्रस्ताव निष्कृय भएको पत्र पठाएका हुन् ।

गौतमले मङ्सिर २१ गते बुधबार राष्ट्रपति कार्यालय, प्रधानमन्त्री कार्यालय, संवैधानिक परिषद, सर्वोच्च अदालत, न्यायपरिषद र जबरालाई पत्र पठाएर फागुन १, २०७८ मा जबराले कार्य सम्पादन गर्न नपाउने भनी लेखेको पत्र निष्प्रभावी भएको जानकारी दिएका हुन् ।

चोलेन्द्र शमशेरले महाभियोग संसदको कार्यकाल समाप्त भइसकेको हुँदा महाभियोग निष्प्रभावी भएकोले प्रधानन्यायाधीशको नियमित काम गर्न पाउनुपर्ने उल्लेख गर्दै पत्र पठाएका थिए । त्यसको प्रतिउत्तरमा संघीय संसदका महासचिव डा. गौतमले निलम्बन फुकुवा गरिदिएका हुन् ।

जबराविरुद्ध गत वर्षको फागुन १ गते सत्तारुढ दलहरु कांग्रेस, माओवादी केन्द्र र एकीकृत समाजवादीका सांसदहरूले प्रतिनिधिसभामा महाभियोग दर्ता गराएका थिए । महाभियोग दर्ता भएपछि जबरा स्वतः निलम्बनमा परेका थिए ।