काठमाडौं । सांसद मदन कुमारी शाह (गरिमा)ले मुलुकको आर्थिक समृद्धिका लागि सबैभन्दा पहिला बैंकिङ प्रणाली सुधार गर्नुपर्ने बताएकी छिन् । बुधबार राष्ट्रिय सभाको बैठकमा जरुरी सार्वजनिक महत्वको प्रस्ताव पेश गर्दै सांसद शाहले यस्तो बताएकी हुन् ।

वित्तीय क्षेत्रको अवस्था दिनप्रतिदिन बिग्रिदै गएकोले समग्र मुलुकको आर्थिक समृद्धिको लागि पहिला बैंकिङ प्रणाली सुधार्नुपर्ने उनले बताइन् । ‘अहिलेको अवस्था हेर्दा बैंकहरु धनी भइरहेका छन् । तर, गरिब जनता गरिबीकै रेखामुनी छन् ।’, उनले भनिन्, ‘बैंकहरुमा ऋणको ब्याज साह्रै चर्को छ, निक्षेपको ब्याज चाहिँ घट्दो छ । त्यसैमाथि धनाढ्यले मात्रै ऋण पाउने अवस्था छ । त्यसैले यस्तो प्रवृत्ति र प्रणालीको अन्त्य गरी समष्टिगत रुपमा मुलुकको आर्थिक समृद्धिको विषयमा सोच्ने बेला भएको छ ।’

पछिल्लो समय ‘डाटा’ले मुलुकको अर्थतन्त्रको परिसूचक सुधारको लयमा देखाएपछि वास्तविक अर्थतन्त्रको अवस्था धरासायी नै रहेको सांसद शाहीको भनाई छ । ‘अर्थतन्त्र सुधारको संकेत देखिएको दाबी गरिए पनि खासमा अवस्था त्यस्तो छैन ।’, उनले भनिन्, ‘आयत बढेको-बढ्यै छ, निर्यात भने घटिरहेको छ । र बढ्दो आयातलाई प्रतिस्थापन गर्न नसक्दा समस्या झनै विकराल बनेको छ ।’

त्यस्तै, सांसद शाहले अहिले मुलुक पूर्ण रुपमा रेमिट्यान्समा मात्रै निर्भर रहेको बताइन् । ‘अहिले मुलुक रेमिट्यान्सकै भरमा मात्रै निर्भर छ, जुन कदापी ठिक होइन ।’, उनले भनिन्, ‘रेमिट्यान्स आउन रोकियो वा कुनै ठूलै संकट आयो भने कसरी हुन्छ ? रेमिट्यान्समै निर्भर हुँदा राज्यको ढुकुटी सुक्दैछ, बेलैमा ध्यान नदिए ठुलै संकटको सामना गर्नुपर्ने हुनसक्छ ।’