जापान । अगस्ट ६ सन् १९४५ मा अमेरिकाले एटम बम खसालेपछि हिरोसिमा ध्वस्तप्राय हुँदा हिरोसिमा फेरी उठ्नेछ भन्ने सायदैले सोचेका थिए होलान् । तर, अहिले हिरोसिमा फरक छ, विकसित छ । हो, समय सधैं उही हुँदैन र समय गलत हुँदा आत्तिनु हुँदैन भन्ने उदाहरण स्वयम् हिरोसिमा हो । र त हिरोसिमा पुगेपछि जीवनको यही सत्य सम्झन्छन् धेरैले ।

सेयर तालिमका क्रममा हिरोसिमा पुगेका सेयर गुरु सुबासचन्द्र भट्टराईले पनि हिरोसिमाकै उदाहरण दिंदै बियरिस बजारमा सेयर लगानीकर्तालाई नआत्तिन भनेका छन् । ‘अमेरिकाले बम हान्दा ध्वस्त भएको जापान त अहिले यस्तो भएको छ भने हामी किन आत्तिने ? हामीलाई न कसैले बम हानेको छ, न हामीले केही गरेका छौँ । हामीले त ३२०० मा सेयर किनेका मात्रै हौँ ।’, उनले भने, ‘यदी त्यसबेला जापानले हिम्मत हारेको भए आज जापान यति सुन्दर हुन्थेन । त्यसैले सेयर बजारमा डुबेँ भन्नेहरु आत्तिनु हुँदैन राम्रो दिन अवश्य आउँछ ।’

त्यस्तै, सेयर गुरु भट्टराईले जापानमा रहेर सेयर बजार सिक्न चाहने नेपालीहरुलाई इन्भेष्टर बन्न आग्रह गरेका छन् । जापानमा रहेका नेपालीहरुलाई लक्षित गर्दै सेयर गुरु भट्टराईले भने– ‘तपाईहरुको दैनिकी एकदमै व्यस्त छ, ट्रेडर बन्न सक्नुहुन्न । ट्रेडर बन्नका लागि बजारमा एकदमै धेरै समय दिनुपर्छ तर त्यो तपाईहरुको लागि सम्भव छैन ।’, भट्टराईले भने, ‘तर, तपाईहरु असल इन्भेष्टर बन्न सक्नुहुन्छ । महिनाभर जति कमाउनुहुन्छ त्यसको ५० प्रतिशत बचत गरेर स्टक किन्दै जानुस्, १० वर्षपछि तपाईंको पोर्टफोलियो अत्यन्तै सुन्दर हुनेछ ।

(जापानको हिरोसिमाबाट सहकर्मी सुरज प्याकुरेलले सेयरगुरु भट्टराईसँग गरेको कुराकानी)