काठमाडौं । सर्बिया पठाईदिन्छु भन्दै रकम ठगी गर्ने दुई जना व्यक्ति पक्राउ परेका छन् । सर्लाही जिल्ला लालबन्दी नगरपालिका वडा नं. १२ स्थाई घर भई हाल भक्तपुर जिल्ला सुर्यविनायक नगरपालिका वडा नं. ४ दधिकोट बस्ने २७ वर्षीय सुमन बुढाथोकी र इलाम जिल्ला सुर्योदय नगरपालिका वडा नं १४ घर भई हाल काठमाडौं जिल्ला कगेश्वरी मनहरा नगरपालिका वडा नं.९ बस्ने ३० वर्षीय छविलाल अधिकारी पक्राउ परेका हुन् ।

उनीहरुले बिनोद श्रेष्ठलाई वैदेशिक रोजगारीका लागि सर्बिया पठाईदिने र सर्बिया पुगेपछि कृषि फर्ममा काम लगाईदिने, मासिक ५० हजार तलब हुन्छ भनी विश्वास दिलाई प्रलोभनमा पारेर रकम ठगी गरेका थिए । उनीहरुले पिडितबाट पटक पटक गरी एक लाख ५० हजार रुपैयाँ लिई सम्पर्क विहिन भएका थिए ।

वैदेशिक रोजगार विभागले काठमाडौं उपत्यका अपराध अनुसन्धान कार्यालयलाई उनीहरुको खोजि गरी उपस्थित गराउन पत्राचार गरेको थियो । कार्यालयबाट खटिएको प्रहरी टोलिले उनीहरुलाई भदौ ६ गते समाखुशीबाट पक्राउ गरेको हो ।

पक्राउ परेका उनीहरुलाई ठप अनुसन्धान तथा कारवाहीका लागि वैदेशिक रोजगार विभाग पठाईएको प्रहरीले जनाएको छ ।