काठमाडौँ । व्यवस्थापनमा ‘इस्यु’ आएपछि बैंक कतिसम्म कमजोर हुँदै जान्छ भन्ने तथ्यको उदाहरण बनेको छ कुमारी बैंक । कर्मचारी युनियन नै दुईवटा भएपछि तिनलाई व्यवस्थापन गर्न नसक्दा अहिले बैंकको काम प्रभावित मात्र बनेको छैन, बैंकभित्र बाहिरी हस्तक्षेपका कारण बैंक व्यवस्थापन नै निरिह बनेको छ । बैंकका कर्मचारीलाई सरुवा गर्दा युनियन तात्ने, मन्त्रीको फोन आउने, लगायतका झमेलाले अहिले बैंकको काम नै प्रभावित बनेको छ ।

बैंकमा युनियनको लफडाले उग्र रुप लिनुको पछाडीको कारण एउटा सरुवा हो । कुमारी बैंकमा कार्यरत कर्मचारी तृप्ति रानालाई सुदूरपश्चिम सरुवा गरेपछि निम्तिएको लफडाले बिगारेको बैंकभित्रको वातावरण अझै साम्य भएको छैन । रानालाई बैंकले सुदूरपश्चिम सरुवा गरेको थियो । तर उनको सरुवा फिर्ता गर्नका लागि बैंकमा मन्त्रीको समेत फोन आयो । राना एक मन्त्रीकी आफन्त हुन् । मन्त्रीको तारान्तरको दबाबले बैंकले रानाको सरुवा फिर्ता गरेर काठमाडौँमा नै जिम्मा दिन बाध्य भएको थियो । एक कर्मचारीको सरुवाको विषयलाई लिएर मन्त्रीकै फोन आउन थालेपछि बैंक व्यवस्थापन अहिले निरीह बनेको छ । बैंकको डिसिजन भन्दा पनि बाहिरी दबाबले सरुवा बढुवा रोक्नुपर्ने वा गर्नुपर्ने अवस्था आएपछि यतिबेला व्यवस्थापन टिमसमेत के गर्ने भन्ने तनावमा छ ।

आफुलाई सरुवा गरेपछि तृप्ति राना तत्कालीन कुमारी बैंकमै रहेको कर्मचारी युनियनमा सामेल नभई तत्कालीन एनसीसी बैंकबाट आएको कर्मचारी युनियनमा सामेल भएकी थिईन् । बैंकका हाकिमलाई पनि थर्काउन सक्ने, थर्काउने, मन्त्रीलाई फोन गर्न पनि लगाउने सक्ने, लगाएरै काम गराईहाल्ने देखेपछि र महिला पनि भएका कारण रानालाई तत्कालीन एनसीसीबाट आएको युनियनले रानालाई सदस्यबाट सिधै उपाध्यक्ष नै बनाइदियो। अव उनी युनियनको अध्यक्ष बन्ने लाइनमा छिन् । राजनीतिक पावर, र हाकिमलाई थर्काउन सक्ने क्षमताका कारण उनी युनियनमा मात्र होइन, यतिबेला बैंकभर नै चर्चामा छिन् । तर, उनी अध्यक्ष हुँदै गर्दा बैंकका हाकिम भने तनावमा छन् ।

तृप्ति रानालाई सरुवा गरेको भन्दै बैंकका डेपुटी सीइओ रामचन्द्र खनालविरुद्ध युनियनले पटक पटक चेतावानी दियो । यतिसम्मकि उनले युनियनका विषयमा बोलेको विषयलाई लिएर उनीविरुद्ध युनियनले विज्ञप्ति नै जारी गर्यो । अहिले त यतिसम्मको स्थिति आएको छ कि बैंकका डेपुटी सीइओ रामचन्द्र खनाल तृप्तिका बारेमा बोल्न नै चाहादैनन् ।

‘तपाईंले सरुवा गर्न नसकेको मान्छे त युनियनको अध्यक्ष हुने कुरा छ नि ? तपाईंको कन्फीडेन्स डाउन हुन्छ कि हुँदैन ?’ भन्ने हाम्रो प्रश्नमा डेपुटी सीइओ खनाल भन्छन्- ‘भो नबोलौं हजुर ।’

अर्थ सरोकारसँग कुराकानी गर्दै उनले कर्मचारीहरुबीच बेमेल हुँदा त्यसको प्रभाव बैंकमा पर्ने भएकाले यसतर्फ संचारकर्मीहरुले पनि ख्याल गर्नुपर्ने तर्क गरे । ‘हामी काम गरेर खाने मान्छे, बैंकको तनाव यसै छ, कर्मचारी युनियन एक बनाउन नसकिएको स्थिति छ, प्रयास जारी छ, प्रयास गर्नै पर्यो । साथीहरु मिल्नुभएको छैन । अव अरु कुरा के गर्नु र ? संचारकर्मी साथीहरुले पनि यो तथ्य बुझिदिए राम्रो हुन्थ्यो ।’

यता राना भने अर्थ सरोकारको सम्पर्कमा आउन नै चाहिरहेकी छैनन् । पटक पटक फोन गरेर उनको धारणा लिन खोज्दा पनि हाम्रो सम्पर्कमा आउन नचाहेकी उनले अहिले अर्थ सरोकार सम्बाददाताको फोन नै ब्लक लिष्टमा राखिदिएकी छिन् ।