काठमाडौं । वैदेशिक रोजगारीका लागि मलसिया जानेको संख्या ह्वात्तै बढेको छ । विगतदेखि नै वैदेशिक रोजगारीका लागि मुख्य गन्तव्यका रुपमा रहेको मलेसियामा गत आर्थिक वर्षमा मात्रै नयाँ र पुनः श्रम स्वीकृति लिएर कुल २ लाख ५९ हजार ५ सय ९४ जना नेपाली रोजगारीका लागि पुगेका छन् ।

गत आर्थिक वर्षमा मलेसियामा रोजगारीका लागि जाने नेपालीको संख्या हालसम्मकै उच्च रहेको वैदेशिक रोजगार विभागले जनाएको छ । आर्थिक वर्ष २०७९/८० मा मेलियासका लागि २ लाख ५२ हजार २ सय ९५ पुरुष र ७ हजार २ सय ९९ जना महिला कामदारहरुले नयाँ तथा पुनः श्रम स्वीकृति लिएका छन् ।

मलेसियाका लागि नयाँ श्रम स्वीकृति लिने नेपाली कामदारको संख्या मात्रै २ लाख १९ हजार ३ सय ५७ जना रहेको छ । कोरोना महामारीपछि मलेसियाले ठूलो संख्यामा श्रमिक माग गरेपछि वैदेशिक रोजगारीका लागि मलेसिया जानेको संख्या ह्वात्तै बढेको विभागको अनुमान रहेको छ ।

हाल मलेसियामा नेपाली कामदारहरुले न्यूनतम १५ सय रिंगित अर्थात नेपाली ४३ हजार ८ सय १४ रुपैयाँ पाउँछन् ।