काठमाडौँ । अर्थमन्त्री डा. प्रकाशशरण महतले देशको अर्थतन्त्र सकारात्मक बाटोमा रहेको दाबी गरेका छन् । शनिबार काठमाडौँमा आयोजित नाफिजको १५औँ वार्षिकोत्सव कार्यक्रमलाई सम्बोधन गर्दै उनले यस्तो बताएका हुन् । 

कार्यक्रममा बोल्दै अर्थमन्त्री डा. महतले देशको अर्थतन्त्र सकारात्मक बाटोमा भए पनि बाहिर हल्ला भने नकारात्मक भएको दाबी गरेका छन् । उनले अहिले सामाजिक सञ्जालको जमानामा नकारात्मक कुरा बिक्ने भएकाले अर्थतन्त्रलाई लिएर नकारात्मक कुरा आउने गरेको बताएका छन् । 

‘अहिले सामाजिक सञ्जालको जमाना । यहाँ नकारात्मक कुरा बिक्छ । त्यसैले नकारात्मक कुरा नै आउँछ ।’, अर्थमन्त्री डा. महतले भने, ‘तर, अहिले अर्थतन्त्रले सकारात्मक बाटो पक्रेको छ । अहिले अर्थतन्त्र सकारात्मक तर्फ उन्मुख हुँदैछ ।’

त्यस्तै, उनले पछिल्लो समय अर्थतन्त्रका सबै सूचकले सुधारको लय देखाएकाले सबैले आत्मविश्वास र सकारात्मक सोच्न आवश्यक रहेको बताएका छन् ।