काठमाडौँ । अदालतको निर्णयले मारमा परेका बैंकहरुले आफुले तिरेको कारलाई रिजर्भबाट मिलान गर्न पाउने भएका छन् । नेपाल राष्ट्र बैंकसँगकै सल्लाहमा बैंकहरुले यस विषयमा औपचारिक प्रस्ताव पठाईसकेका छन् । बैंकहरुलाई यसरी हिसाब मिलान गर्न राष्ट्र बैंकले स्वीकृति दिए यो बर्षको नाफामा असर पर्ने छैन ।

अदालतको निर्णयपछि बैंकहरुले तिर्नुपरेको करका कारण कतिपय बैंकहरुको वासलातनै नकारात्मक हुने चर्चा भईरहेका बेला बैंकहरुलाई राष्ट्र बैंकले यस्तो विशेष सुविधा दिने भएको हो ।

बैंक तथा वित्तीय संस्थाहरुले पहिलादेखि नै आफुले कमाएको नाफाबाट २० प्रतिशत रिटर्न अर्निङवापतको रकम रिजर्भमा राख्दै आएका छन् । सो रिजर्भमा अहिलेको कर दायित्वलाई मिलान गर्न पाउने अवस्था बन्दा बैंकहरु घाटामा देखिने छैनन् ।

राष्ट्र बैंककै सल्लाहमा बैंकहरुले यस्तो अनुरोध राष्ट्र बैंकमा पठाएकाले राष्ट्र बैंकले पनि सो स्वीकृति दिने पक्कापक्की प्राय: छ । राष्ट्र बैंकले औपचारिकताका लागि यस विषयमा कानुन विभागसँग राय लिने लगायतका प्रक्रिया सुरु गरेको बुझिएको छ ।