काठमाडौँ । प्रधानमन्त्री पुष्पकमल दाहाल (प्रचण्ड)ले हालसम्म १८ सहकारीलाई समस्याग्रस्त घोषणा गरिसकेको बताएका छन् । नयाँ मन्त्रिपरिषद् गठनपछि बसेकोठ संसदको पहिलो बैठकलाई सम्बोधन गर्दै प्रधानमन्त्री प्रचण्डले ठूलो कारोबार गर्ने समस्या उन्मुख १८ सहकारीलाई समस्याग्रस्त घोषणा गरिएको बताएका हुन् ।

‘ठूलो कारोबार गर्ने समस्या उन्मुख सहकारी संस्थाहरुको पहिचान गरी नेपाल राष्ट्र बैंकको समेत सहभागितामा सदन अनुमगन कार्य प्रारम्भ गरिएको छ ।’, प्रधानमन्त्री प्रचण्डले भने, ‘हालसम्म १८ सहकारी संस्थालाई सहकारी ऐन २०७४ बमोजिम समस्याग्रस्त सहकारी संस्था घोषणा गरी सम्पत्ति र दायित्व फरफारक गर्न समस्याग्रस्त सहकारी व्यवस्थापन समतिमा पठाइसकिएको छ ।’

त्यस्तै, प्रधानमन्त्री प्रचण्डले समस्या उन्मुख ठूलो कारोबार गर्ने अन्य सहकारीमाथि प्रहरीको केन्द्रीय अनुसन्धान ब्युरो सीआईबीले पनि अनुसन्धान गरिरहेको जानकारी दिएका छन् ।

साथै उनले बचत तथा ऋणको कारोबार गर्ने सहकारीलाई संघ, प्रदेश र स्थानीय तहबाट दर्ता, कार्यक्षेत्र विस्तार र सेवा केन्द्रको स्वीकृतिमा रोक लगाइएको र वित्तीय सहकारी संस्थाको नियमनका लागि दोस्रो तहको नियामक निकाय बनाउने कानूनको मस्यौदा अन्तिम चरणमा पुगेको पनि बताएका छन् ।