काठमाडौँ । कर्जा प्रवाह गर्दा घुस लिएको आरोपमा नेपाल बैंकका अध्यक्षमाथि छानबिन सुरु भएको छ । अख्तियार दुरुपयोग अनुसन्धान आयोगले बैंकका अध्यक्ष डा. चन्द्रबहादुर अधिकारीमाथि छानबिन सुरु गरेको हो । 

बैंकबाट कर्जा प्रवाह गर्दा अध्यक्ष अधिकारीले घुस लिएको भन्ने उजुरी परेपछि छानबिन सुरु गरिएको अख्तियारका एक उच्च अधिकारीले बताएका छन् । 

ती अधिकारीका अनुसार अध्यक्ष अधिकारीले कर्जा प्रवाह गरिदिएबापत लिने घुसका लागि आफ्नो ड्राइभरलाई प्रयोग गर्ने गरेको खुलेको छ । अधिकारीका ड्राइभर उमेश महर्जनको बैंक खातामा करिब ३० लाखसम्मको कारोबार भएको पनि देखिएको अख्तियारका ती अधिकारीको भनाई छ । 

हाल अख्तियारले बैंकका अध्यक्ष अधिकारीसँग बयान लिने र प्राप्त प्रमाण ‘क्रसचेक’ गर्ने काम गरिरहेको छ । अध्यक्ष अधिकारीले पछिल्लो तीन दिनदेखि अख्तियारमा बयान दिइरहेका छन् । त्रिभुवन विश्वविद्यालयका अवकाश प्राप्त सहप्राध्यापक समेत रहेका अधिकारीलाई तत्कालीन अर्थमन्त्री प्रकाशशरण महतले बैंकको अध्यक्ष नियुक्त गरेका थिए । अध्यक्ष अधिकारीको अनुसन्धान सकिएपछि उनीविरुद्ध भ्रष्टाचार मुद्दा दायर गर्ने तयारी अख्तियारले गरेको छ ।

के भन्छन् सीइओ ?
नेपाल बैंकका अध्यक्ष तिलक राज पाण्डेले आफ्ना अध्यक्षमाथि सोधपुछ भएको बुझेको र यस विषयमा आफुलाई थप थाहा नभएको दाबी गरेका छन् । अर्थ सरोकारसँगको कुराकानीमा उनले आफुले पनि अध्यक्षमाथि सोधपुछ भएको तर त्यसभन्दा बढी आफुलाई थाहा नभएको दाबी गरेका हुन् । ‘सोधपुछ भएको हो । त्यो भन्दा बढी मलाई केहि पनि थाहा छैन ।’ अर्थ सरोकारसँग कुराकानी गर्दै उनले भने ।

उनले आफुमाथि भने अख्तियारले अनुसन्धान सुरु गरिनसकेको दाबी गरे । उनको र अध्यक्ष दुबैको कार्यकाल सिल गरी अख्तियारले अनुसन्धान गरेको विषयमा अर्थ सरोकारको जिज्ञासाको जवाफ दिँदै उनले भने, ‘मलाई त कुनै पनि पत्र आएको छैन, फोन पनि आएको छैन, सोधपुछ पनि गरिएको छैन । मेरो र अध्यक्षको कार्यकाल सिल गरिएको हल्ला पनि साँचो होइन । अहिले खाना खाँदैछु, केहि समयपछि अफिस पुग्छु, आएरै हेर्न सक्नुहुनेछ ।’