काठमाडौं । नेपाल बैंक लिमिटेडको नाफा बढे पनि लाभांश क्षमता भने घटेको छ । बैंकले सार्वजनिक गरेको गत आर्थिक वर्षको वित्तीय विवरण अनुसार नेपाल बैंक लिमिटेडले ३ अर्ब २६ करोड रुपैयाँ नाफा आर्जन गरेको छ, जुन अघिल्लो आर्थिक बर्षको तुलनामा १०.२९ प्रतिशतले बढी हो । अघिल्लो वर्ष सोही अवधिमा बैंकले २ अर्ब ९६ करोड रुपैयाँ नाफा कमाएको थियो ।

बैंकले सार्वजनिक गरेको विवरणका अनुसार बैंंकको गतवर्षको नाफाबाट सेयरधनीलाई वितरण गर्न मिल्ने नाफा भने १ अर्ब ५४ करोड छ । बैंकको नाफा बढे पनि करिब ६१ करोड रुपैयाँ ‘रेगुलेटरी रिजर्भ’मा छुट्यानु पर्दा बैंकको वितरणयोग्य नाफा भने ५५ प्रतिशतले घटेको छ ।

समिक्षा अवधिसम्ममा बैंकमा १ खर्ब ९६ अर्ब रुपैयाँ निक्षेप तथा कर्जा १ खर्ब ७१ अर्ब रुपैयाँ छ । अघिल्लो वर्ष असार मसान्तमा १ खर्ब ६२ अर्ब थियो भने कर्जा १ खर्ब ३५ अर्ब थियो । बैंकले गत आर्थिक वर्षमा ब्याज आम्दानीबाट ६ अर्ब ८८ करोड रुपैयाँ कमाएको छ । अघिल्लो आर्थिक वर्षमा यस्तो नाफा ६ अर्ब ४२ करोड रुपैयाँ थियो । बैंकको पुँजीकोष अनुपात १५.०४ प्रतिशत छ भने खराब कर्जा अनुपात १.९० प्रतिशत छ । यता बैंकको कर्जा निक्षेप अनुपात ८७.५७ प्रतिशत छ भने स्प्रेडदर ४.०८ प्रतिशत छ । बैंकको बेसरेट ७.९९ प्रतिशत छ । अघिल्लो वर्ष बैंकको बेसरेट ५.७३ प्रतिशत थियो ।