यता उनले सबै संगठनहरु एक ठाउँमा उभिन अहिलेको स्थितिमा सम्भव नै नरहेकोसमेत दाबी गरेका छन् । ‘लगानीकर्ताका संगसंगठनहरु एकै ठाउँमा उभिएर राम्रो खालका गतिविधि गर्न सके सुनमा सुगन्ध हुन्थ्यो । तर त्यो सम्भव छैन । किनकी बजारमा केही सकरात्मक काम गर्न खोज्नेहरुलाई ‘बाईपास’ गर्ने चलन छ । जसले बजारको हित चाहने साथीहरुलाई ठेस पुग्छ । हामीले अहिलेसम्म लगानीकर्ताको हितभन्दा बाहिरका कामहरु गरेका छैनौं ।’ उनले भने- ‘राम्रो गर्ने साथीहरुलाई हाम्रो साथ सँधै हुन्छ । तर आवाज कहाँबाट ? कसले उठायो ? भन्ने कुरालाई पनि ध्यानमा राख्नुपर्छ । बजारको हितका लागि हो भने संगठनहरु एक हुनुपर्छ तर मैले त्यसको सम्भावना देखेको छैन ।’

‘हामी लगानीकर्ताहरु यसै पनि एक छौँ । लगानीकर्तालाई समस्या पर्दा हामी सबैजना एकजुट हुन्छौं र समाधानका लागि काम गर्छौैं । अहिलेको समय भनेको लगानीकर्ता संगठन एक भएर देखाउने भन्दा समस्या समाधानमा लागि पर्ने समय हो । एक ढिक्का भएर काम गरेका राजनीतिक दलहरु पनि बेलाबेलामा समस्या पर्दा टुटेको यथार्थ हामीले देखेका छौँ । त्यसैले पनि अहिले लगानीकर्ताका संगठनहरु एक हुनुभन्दा एकजुट भएर काम गर्नु उपयुक्त हो । हामी विगतदेखि नै विधिवत् रुपमा दर्ता भएर काम गरिरहेका छौँ र जो अहिले एकताको नारा लिएर अगाडी आउनुभएको छ उहाँहरुको संगठनमा कुनै विगत छैन ।’ अर्थ सरोकारसँग कुराकानी गर्दै उनले भनिन्- ‘यसैपनि हाम्रो संगठन महासंघ जस्तै छ । अहिलेसम्म देशभरका ७३ जिल्लामा सेयर बजारसम्बन्धी सचेतना कार्यक्रम पनि गरिसकेका छौँ । त्यसैले पनि यो लगानीकर्ताका संगठन मर्ज गर्ने, फुटाउने भन्ने कुराचाहिँ समय सापेक्ष होइन । यद्यपी लगानीकर्ताको हितका पक्षमा हामी सँधै छौँ ।’

अर्थ सरोकारसँग कुराकानी गर्दै उनले लगानीकर्ताका संगठनले काम गरेनन् भन्ने भ्रमको खेती भईरहेकोसमेत आरोप लगाएकी छिन् । ‘उहाँहरुलाई हाम्रो काम चित्त नबुझेको होइन । तर लगानीकर्ताका संगठनले काम गरेनन् भन्ने भ्रमको खेती गर्ने षडयन्त्र भयो । र त्यही गलत षडयन्त्रले गर्दा केही लगानीकर्ताहरु भाँडिनुभएको हो । हाम्रो संगठनमा रहनुभएको ३०–३२ हजार लगानीकर्तालाई त त्यस्तो लागेको छैन । दुईचार जनालाई लाग्यो भन्दैमा संगठन मर्ज गरिहाल्नुपर्छ भन्ने चाहिँ होइन ।’ उनले भनिन्।