काठमाडौं । दुबई पठाइदिन्छु भन्‍दै रकम ठगेको आरोपमा प्रहरीले एक जनालाई पक्राउ गरेको छ । जिल्ला नवलपरासी, प्रतापपुर गाउपालिका-५ गोपिगंज घर भई हाल काठमाडौंको गोंगबु बस्ने ५४ वर्षीय भोज बहादुर चौधरीलाई प्रहरीले पक्राउ गरेको हो ।

चौधरीले नर बहादुर थनेत समेतलाई वर्किङ्ग भिशामा दुबई पठाइदिने भन्‍दै प्रति व्‍यक्ति ८ लाख रकम लाग्ने र दुबईमा आर्म्स गार्डमा जागिर लगाइदिने प्रलोभन देखाई पिडितहरुबाट ३८ लाख रकम ठगि गरेर सम्पर्क विहीन भएको प्रहरीले जनाएको छ ।

उनलाई काठमाडौं उपत्यका अपराध अनुसन्धान कार्यालयबाट खटिएको टोलीले शुक्रबार सामाखुशीबाट पक्राउ गरेको हो । पक्राउ परेका चौधरीलाई थप अनुसन्धान तथा कारबाहीको लागि वैदेशिक रोजगार विभाग, बुद्धनगर पठाइएको प्रहरीले जनाएको छ ।