काठमाडौँ । सेयर बजारका बादशाहका रुपमा परिचित अमेरिकी लगानीकर्ता वारेन बफेट भारतीय सेयर बजारबाट बाहिरिएका छन् । भारतमा ६ सय ३० करोड भारतीय रुपैयाँ (करिब १० अर्ब नेपाली रुपैयाँ) घाटा खाएपछि उनी भारतीय सेयर बजारबाट बाहिरिएका हुन् ।

भारतीय फिनटेक कम्पनी पेटीएममा लगातार घाटा बेहोरेपछि उनी भारतीय सेयर बजारबाट बाहिरिएको अन्तराष्ट्रिय सञ्चार माध्यमहरुले जनाएका छन् ।

अन्तराष्ट्रिय सञ्चार माध्यमका अनुसार बफेट प्रमुख कार्यकारी अधिकृत (सिईओ) रहेको बर्कसायर हाथवेले पेटीएममा रहेको सम्पूर्ण सेयर ओपन मार्केटमार्फत १ हजार ३ सय ७० करोड भारुमा बिक्री गरेको हो ।

हाथवेले सन् २०१८ मा पेटीएमको १ करोड ७० लाख २७ हजार १ सय ३० कित्ता सेयर प्रतिकित्ता १२७९.७० रुपैयाँका दरले किनेको थियो । जसमध्ये बफेटलाई ६०० करोड भारतीय रुपैयाँ नोक्सान भएको छ ।

शुक्रबार बल्क डिलमा पेटीएमको १.५६ करोडभन्दा बढि कित्ता सेयर बिक्री भएको नेशनल स्टक एक्सचेन्ज (एनएसई)ले जनाएको छ ।