कैलाली । कैलालीमा भन्सार छलीका करिब दश लाख बढीका सामान बरामद गरिएको छ । सशस्त्र प्रहरी बल नेपाल नम्बर ३४ गण हेटक्वाटर कैलालीबाट खटिएको टोलीले कैलालीका विभिन्न ठाउँबाट दश लाख ८ हजार दुई सय मूल्य बराबरको भन्सार छलीका सामान बरामद गरेको हो । 

१३ मंसिरमा सशस्त्र प्रहरी बल बिओपि बङ्ग्राकटानबाट सशस्त्र प्रहरी निरीक्षक हरिचन्द्र ढकालको कमान्डमा खटिएको टोलीले धनगढी–९ बाट ४ लाख ३९ हजार २ सय मूल्य बराबरको अवैध सामान बरामद गरेको थियो । मंसिर १३ गते बरामद गरिएको सामानमा अधिकांश कपडाहरु रहेका थिए । 

त्यस्तै, मंसिर १४ गते सशस्त्र प्रहरी बल नेपाल नम्बर ३४ गण हेटक्वाटर कैलालीबाट सशस्त्र प्रहरी निरीक्षक धन बहादुर नाथको कमाण्डमा खटिएको टोलीले भन्सार छलीका ३ लाख ५१ हजार १ सय बराबरको कपडा बरामद गरेको थियो ।

सोही दिन सशस्त्र प्रहरी बल नेपाल बिओपी बङ्ग्राकटानको टोलीले पुनः २ लाख १७ हजार ९ सय बराबरको कपडा, किराना तथा कस्मेटिक लगायतका सामानहरु बरामद गरेको थियो । यसरी विभिन्न ठाउँबाट बरामद गरिएको सामान प्रहरीले आवश्यक कारवाहीका लागि कैलाली भन्सार कार्यालय त्रिनगरमा बुझाएको छ । 

पछिल्लो समय खुला नाकाको प्रयोग गरी हुने अवैध तस्करी तथा भन्सार छली रोक्नका लागि प्रहरी तथा सशस्त्र प्रहरीको टोलीले सीमा क्षेत्रमा आवश्यक निगरानी बढाउँदै आएको छ ।