काठमाडौँ । हनी ट्रयापमा संलग्न २ जना पक्राउ परेका छन् । पक्राउ पर्नेमा सिन्धुपाल्चोक घर भई काठमाडौँ बौद्ध बस्ने तेन्जी डोमा छिरिङ र सोही जिल्ला घर भई हाल काठमाडौँ मूलपानी बस्ने सौरभ तामाङ रहेका छन् ।

पक्राउ परेका व्यक्तिहरूले आफ्नो नाम परिर्वतन गरेर पीडितसँग भेटी अश्लील भिडियो बनाई ब्ल्याकमेल गरेर रकम असुल गर्ने गरेका थिए । त्यसैगरी सौरभले लीलाबहादुर तामाङ नाम परिवर्तन गरेका थिए भने तेन्जीले सिर्जना तामाङ नाम राखेकी थिइन् ।

प्रहरीका अनुसार सौरभले पीडितको फेसबुक आइडी आफ्नो ह्वाट्सएपमार्फत सिर्जनालाई पठाएका थिए । त्यस्तै, सिर्जनाले भने पीडितसँग कुरा गरी आफ्नो कोठामा भेट्न बोलाएकी थिइन । पीडित भेट्न आउन सहमत भएपछि सौरभले आफ्नो मोबाइल भिडियो बनाउन सिर्जनालाई दिएका थिए ।

उनले सो मोबाइलबाट आफ्नो र पीडितको अश्लील भिडियो बनाई सौरभलाई फिर्ता गरेकी थिइन् । उक्त भिडियोलाई सिर्जनाले र सौरभले पीडितलाई पठाई पैसाको बार्गेनिङ गरेपछि पीडितले प्रहरीकोमा उजुरी दिएका थिए ।

छिरिङ र तामाङले १ करोडको बार्गेनिङ गरेर १५ लाखमा कुरा मिलाएका थिए । प्रहरीले उनीहरूको साथबाट २ वटा मोबाइल र ३४ हजार ५ सय रुपैयाँ बरामद गरेको छ ।

उनीहरूलाई आपराधिक मुद्दामा थप अनुसन्धानका लागि जिल्ला प्रहरी परिसर काठमाडौँ पठाइएको छ।