काठमाडौँ । साउन लागेसँगै कुखुराको मासुको मूल्य ह्वात्तै घटेको छ । साउनमा मासुको खपत घटेपछि ब्रोइलर कुखुराको मासुको मूल्य किलोमै ८० रुपैयाँले घटेको हो । 

राष्ट्रिय कुखुरा बिक्री व्यवसायी महासंघका अनुसार असारमा प्रतिकिलो ४ सय २० रुपैयाँ रहेको ब्रोइलर कुखुराको मूल्य साउन लागेसँगै प्रतिकिलो ३ सय ४० रुपैयाँमा झरेको छ । 

हाल बजारमा अन्य महिनाको तुलनामा ५० देखि ६० प्रतिशत मात्रै कुखुराको मासु खपत भएको छ । कुखुराको मासुको खपत ह्वात्तै घटेपछि कुखुराको मासुको मूल्य घटाउनुपरेको व्यवसायीहरुले बताएका छन् । 

हाल कुखुराको तयारी मासुसँगै जिउँदो कुखुराको मूल्य पनि घटेको छ । यसअघिसम्म जिउँदो ब्रोइलर कुखुरा प्रतिकिलो २ सय ६० रुपैयाँमा पाइने गरेको थियो भने हाल जिउँदो कुखुराको मूल्य प्रतिकिलो २ सय ५० रुपैयाँ रहेको छ ।