काठमाडौँ । वैदेशिक रोजगारीका लागि विभिन्न देश पठाउने भन्दै रकम ठगी गर्ने दुई जना पक्राउ परेका छन् । पक्राउ पर्नेमा ५१ वर्षीय राज कुमार मानन्धर र ४० वर्षीय ओम बहादुर खत्री रहेका छन् ।

उनीहरुलाई काठमाडौँ उपत्यका अपराध अनुसन्धान कार्यलयबाट खटिएको प्रहरी टोलीले पक्राउ गरेको हो । प्रहरीका अनुसार उनीहरुले आकर्षक तलबको प्रलोभनमा पारेर पीडितहरुबाट रकम ठगी गरेर सम्पर्कविहीन भएका थिए ।

पक्राउ परेका मानन्धरले अमेरिका पठाउने भन्दै पीडितबाट ४९ लाख ९७ हजार रुपैयाँ र खत्रीले युके पठाउने भन्दै ६ लाख ७५ हजार रुपैयाँ ठगी गरेको प्रहरीले जनाएको छ ।

हाल भने उनीहरुलाई थप अनुसन्धान तथा आवश्यक कारवाहीका लागि वैदेशिक रोजगार विभाग पठाईएको प्रहरीले जनाएको छ ।