काठमाडौँ । कोरोना भाइरस काठमाडौँ छिरेको संकेत देखिएको छ । काठमाडौं पेप्सीकोलास्थित सनसिटी अपार्टमेन्टमा बस्ने एकै परिवारका तीन जना सदस्यमा गरिएको र्‍यापिड डाइग्नोस्टिक टेस्टको नतिजा पोजेटिभ देखिएपछि उनीहरुलाई अस्पताल भर्ना गरिएको छ । झन्डै एक महिनाअघि लण्डनबाट फर्किएका उनीहरूमा र्‍यापिड टेस्ट गर्दा शंका लागेपछि उनीहरुलाई अस्पताल भर्ना गरिएको हो । तीनजनामध्ये आमा, छोरा र बुहारी छन्।

अहिले तीनै जनालाई पाटन अस्पतालको आइसोलेसनमा भर्ना गरिएको अस्पतालका निर्देशक डाक्टर विष्णु शर्माले पुष्टी गरे । ‘आधा घण्टाजस्तो भयो उहाँहरूलाई भर्ना गरिएको। उहाँहरू सबैको स्वास्थ्य अवस्था सामान्य छ,’ उनले भने ।यसैबीच एकै परिवारका ३ जनालाई कोरोना भेटिएको आशंकापछि सनसिटी अपार्टमेन्ट सिलबन्दी गरिएको छ भने, उच्च सताकर्ता अपनाउन प्रहरी तैनाथ गरिएको छ। 

र यहि अपार्टमेन्टसँग जोडिएका ३ बैंकका एटिएमहरुमा जानेहरुले सतर्क रहन र परिक्षण गराउन सुझाव दिएका छन् । ‘आज कोरोना र्‍यापिड टेस्ट पोजिटिभ देखिएको सनसिटी अपार्टमेन्टमै जोडिएको तिनवटा एटिएम छ । नबिल, ग्लोबल र सनराइज ब्यांक । यो हिसाबले त्यहाँ निकै मानिसहरुको आवतजावत हुन्छ । सरकारले तुरुन्तै यो क्षेत्र सम्पूर्ण लकडाउन गरेर काँडाघारी-टाउनप्लानिङ्ग- पेप्सिकोला आसपास आशंका लागेका मानिसहरुको कोरोना चेक गर्न व्यवस्था गर्नुपर्छ ।म आफै पनि समाचार आउनु अगाडि त्यहिँ नविलको एटिएम गएर आएको हु । कृपया म लगायत सबैको कोरोना चेक गर्ने ब्यवस्था गरियोस । काँडाघारी-टाउनप्लानिङ्ग-पेप्सिकोला आसपास बस्ने हामीहरुले यो चेकको लागि माग गरौ । कृपया यो पोस्ट शेयर गरी सम्बन्धित निकायसम्म पुर्‍याउन मद्दत गर्नुहोला ।’ सौरभ कार्कीले लेखेका छन्’