• अर्थ सरोकार सम्बाददाता 

कैलाली- धनगढीस्थित सेती प्रादेशिक अस्पतालको आइसोलेशन वार्डमा उपचार गराइरहेका धनगढी उपमहानगरपालिका– ५ हसनपुरका कोरोना भाइरस संक्रमित युवकका परिवारका सात सदस्यको रिपोर्ट नेगेटिभ आएको छ । परिवारका आठ सदस्यको थ्रोट स्वाब सङ्कलन गरिएकामा शनिबार उनकी ३४ वर्षीया भाउजुको रिपोर्ट पोजेटिभ आएको थियो ।  सेती प्रादेशिक अस्पतालले अन्य सातको रिपोर्ट नेगेटिभ आएको जनाएको छ । संक्रमित युवककी श्रीमती, चार वर्षीया छोरी, उनका बुवाआमा, दाजु र भतिजीको रिपोर्ट पनि नेगेटिभ आएको छ । 

धनगढीका सक्रमित युवक दुबईबाट चैत ७ गते नेपाल आएका थिए । दिल्लीबाट काठमाडौँ आउँदा उनी चढेको जहाजमा १०८ नेपाली थिए । नेपालगञ्जबाट अत्तरिया हुँदै उनी हसनपुरस्थित घर पुगेका थिए । अहिले उनको अवस्था सामान्य रहेको बताइएको छ । नेपालमा कोरोना सक्रमितको संख्या ९ पुगेको छ भने १ जना निको भएर घर फर्किसकेका छन् ।